Ehmedê Huseynî:
NûRoja we pîroz be!
Hêlînên dilên xwe,
pencereyên kulên xwe ji xwelibakirina perên ronahiyê re
vekin û ji kevokên evînê re, ji mêkewên xewnê re û ji esmanê
dîroka veçiryayî re, ji gurmîna Cûdiyî re, ji pirsên
Herekolî re, ji derdkêşana Gebarî re, ji bindestiya Bagokî
re, ji hişê Şahoyî re, ji keviyên asoyên Qendîlî û ji
şînagirê Agirî re û ji nasnameya Tendûrekî re, beriya hûn
parçeyên çirayên xwe yên şkestî berhev bikin, beriya hûn
qederên xwe bi nav bikin, beriya hûn herikîna xwîna xwe
bipesinîn, beriya hûn bêriya şehîdên xwe bikin, beriya hûn
alên xwe yên ji beybûnan bilind bikin; bibêjin:
NûRoja we pîroz be!
Bagerên serberdayî yên ji
tevnên şevistanan, li ser lêvên Amedê yên ji bendemanê
rawestînin, pasvanên sînoran ji bîra kuçeyên dadayî yên
Qamişloka min bavêjin, rexên hesretê yên Mehabadê li ber
çavên Çarçirayê bi banga xweşmêran biherifînin, dengvedana
Hewlêrê bi gewriyên ji azadiya derengmayî himbêz bikin,
pêxemberên Rihayê hînî aramkêşana bûkan û hînî çavdêriya
hîvên ji kevir, şevên ji kevir û hînî qirçeqirça dilên ji
kevir bikin, agirê pîroz ji lewendiya xwedawendên narincî
bidizin û ji tîna dastanê re, ji birîna gulistanê re, ji
Ahoremezdayên kewistanê re bibêjin:
NûRoja we pîroz be!
Pencereyan vekin û keştiyên
peyvê ji nav pencên pêlên şînîgiriyê birevînin, miriyan hînî
bendemana sorgulan û tênahiya rondikan û lezgîniya bend û
ayetan û rûbarên le´net û nefretan û tofanên kîn û
tolhildanan bikin û ji xeyidîna hetavê re, ji çurisîna
xunavê re, ji zorbaziya gulavê re, ji poşmaniya lîlavê re,
ji sirûdên hinavên silavê re bibêjin:
NûRoja we pîroz be!
Hey Cûdî!
Hûn herdû yek in
Hûn herdû kek in
Hûn herdû birayên min in
Tu û azadî!
Dest ji serhişkiya xwe ya
sal û zemanan berde, dest ji pêlên xwe yên ji dûmana kor û
ji mija sor berde, dest ji kuştina hevalên min ên ji pûng û
nimêjan berde, dest ji parastina ronahiyê berde, dest ji
temenê me yê ku li ser asîtankên xewna te zuha dibe berde,
dest ji kuştina şengebiyan, dest ji destmalên me yên ji
giriyanê berde!
Şevê bi awirên xwe bikuje,
roja me ji bêrîka xwe derxîne, tavsorkê di dergûşa hişê xwe
de bilorîne, xwe ji qirêja dîrokê daweşîne û bi rojê re
hetahetayê bireqise û ji Torosan re, ji pêdariya qehremanan
re, ji velerzîn û jena dilê min û Nûrayê re, ji pênûsa
Êvara min re, ji dudiliya Bazyarê min re, ji govenda dost û
hevalên min re, ji şehîdên pirtûka min re û ji tenhatiya
girtiyên doza min re, bibêje:
NûRoja we pîroz be!
London
19. 03. 2010
